國際影星章子怡與搖滾天王汪峰喺2015年入紙結婚，之後誕下愛女「醒醒」，而汪峰同前度葛薈婕所生嘅女兒「小蘋果」，章子怡都視為己出，極之愛護，仲不時上載全家福大晒幸福。

章子怡趁今日係佢38歲生日，喺微博晒出一家四口嘅合照，仲留言話：「有家心才定，心定則萬事皆明@汪峰 愉快的生日，謝謝。」幾分鐘後，汪峰轉載咗章子怡嘅博文，留言回應話：「有你，有家人的溫暖，足矣！經歷了這些流轉的歲月，到如今你們的歡笑就是彼岸……生日快樂，老婆。」淨係睇佢哋嘅留言已經甜到入心，可以感覺到佢哋有幾恩愛同幾咁幸福！呢個巨形閃光彈，閃到啲網民眼都擘唔大呀！