【on.cc東網訊】鄭嘉穎與田蕊妮主演的無綫黑色喜劇《迷》下星期一（13日）晚上九時三十分首播，兩人皆有突破演出，一向Man爆的鄭嘉穎今次飾演重案組縮骨「小男人」，為保飯碗算到盡。田蕊妮則飾演充滿心計的奸角，演得辛苦亦過足戲癮，她笑謂拍攝時連「自己都驚！」

向來戲裏戲外Man爆的鄭嘉穎在劇中有突破演出，嘉穎今次拋低形象扮演重案組「小男人」縮骨查案，處事婆媽，左閃右避。戲中他還因cheap爆慳到盡，連對女友也孤寒算盡，自然被勢利的港女陳庭欣飛起。嘉穎原來縮得有苦衷，因為要照顧孤苦伶仃的姪女賴慰玲，作為家中經濟唯一支柱的他事事小心，格言是君子不立危牆之下，為保飯碗而變成「小男人」。

演繹時有恐懼

田蕊妮飾演媽媽角色，為了女兒讀書，出於自私及生活逼人下變質變奸，少有做奸角的田蕊妮笑說：「喺我嘅角度，呢個角色絕對唔係奸角，係命運、遭遇令佢作出錯誤選擇，第一步做錯咗選擇，為咗唔畀人知要做其他嘢去掩飾。」投入飾演奸角要承受巨大壓力，田蕊妮坦言拍攝時相當辛苦，但同時也覺得過癮：「我由十幾歲開始演戲，到依家廿幾年，呢個角色竟然係從來冇接觸過，對我嚟講係好過癮、好突破，好多場戲寫得好好，當時會諗究竟我做唔做到，過程係辛苦、去得好盡、好困難、演繹嗰陣自己都有啲恐懼。」

田蕊妮與鄭嘉穎這個配搭亦充滿新鮮感，兩人終於如願合作，她說：「嘉穎戲裏面係徹頭徹尾嘅小男人，我都未見過佢做小男人角色，佢開工都好可愛、好好笑，同佢鏡頭前後都充滿火花，佢確實係一個幾可愛嘅男人，今次合作得好開心，希望出到嚟觀眾畀多啲意見我哋。」