邱美薇跳芭蕾舞為爭排位　減肥過度暈倒

歌手邱美薇（Chelffy）在近日播出的劇集《親親我好媽》中客串飾演芭蕾舞導師Carol，令粉絲另眼相看原來她識跳芭蕾舞，她表示獲邀參與演出都是多得東網曾報道她跳芭蕾舞的新聞。她透露在劇中宣布挑選學生演出回憶起兒時的情景：「當時我們會為喺台上企嘅位置而喺課堂上博表現，表演者企得愈前同多時段演出即係代表你嘅舞藝同老師對你嘅印象有幾好，所以大家都會特登早啲返學校練習，亦會去埋其他分校補課，增取更多練習時間。」講到以前習舞經歷，Chelffy表示曾試過因為肥胖問題影響演出排位：「芭蕾舞本來係高尚優雅同視覺藝術，所以老師除咗對我哋嘅功夫有要求外，身材都要求瘦先會突顯線條美，所以以前我哋雖然運動量多，但都會節食減肥保持體態，有同學淨食麵包皮充飢，我都試過因為減肥過度而暈倒。」

開支大冇考導師牌

擁有RAD（英國皇家舞蹈學院）專業級資格的Chelffy早於求學時期已曾擔任芭蕾舞助教，問到為何不考慮成為執業導師？她表示：「學費太貴，當時升大學唔想屋企太重學費負擔，因為學芭蕾舞一上到專業級以上要好多資出，買對專業啲足尖鞋都要幾千蚊，當時日日咁練真係一個月要買對新，結果我考咗另一間大學主修表演藝術及舞蹈學士學位，除咗學習幕前演出同幕後製作外，亦可以學習舞蹈創作，因為舞蹈都係一種身體語言，同時都令我開始接觸同研究行為藝術。」