偉仔莫文蔚拍宣傳片　Juno被嗌人渣禽獸

麥浚龍（Juno）早前為三首新歌拍攝MV，第一主打歌《人渣》將於情人節派台，14號凌晨音樂平台專頁率先讓樂迷試聽，同日中午MV首播。由於Juno正忙於為新戲《風林火山》籌備前期工作，所以趕緊於一天內拍攝三首歌的MV，當中第二plug《禽獸》更拍了兩個版本。

5個鐘拍4個MV

Juno希望今次MV有統一性，均以一鏡到尾的拍攝手法，沒有花巧的動作。原定預計8小時的拍攝時間，最後以5小時超額完成，Juno表示：「入行以嚟未試過5個鐘拍4個MV，上次拍《結》用咗一整日，而且過程好痛苦，所以今次我想用最簡單嘅方法拍攝。雖然個MV好簡單，但係《人渣》呢首歌算係我入行以嚟，慢歌當中最快嘅Melody，因為啲歌詞好快好密，夾嘴形時相當難。如果大家想了解何謂慢歌中最快嘅Melody，就要留意新歌MV。」

預計9月推出的大碟以不同的愛情故事探討人性，《人渣》一曲講述很多人都喜歡擔任「愛情道德判官」，但在批判人的同時，自己是否曾做過同樣的事。如果有的話，又何來有資格批評其他人？今日中午，Juno的官方YouTube及Facebook出現了一條《人渣》宣傳片，片中出現了四位與Juno新碟完全不相關的藝人，當中包括梁朝偉（偉仔）、古天樂、莫文蔚及謝安琪，片段中四人自問自答「人渣、禽獸？咪Juno囉！」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon