林作撩女捱摑　黑絲女：有錢大晒呀？

與「十優港姐」麥明詩關係欲斷難斷的林作，一直口花花唔定性，跟麥明詩拍拖時被指背女方溝牛津大狀Victoria，與麥明詩傳出分手後又被指對組合Bingo隊長Carman嗒晒糖，更稱Carman為「我女朋友」。其實林作不但有大律師資格、口才出眾，家底亦豐厚，獲林母送贈6,500萬元豪宅作新婚愛巢，難怪他不停穿梭在靚女之間。雖然溝女經驗豐富，但想不到原來亦有失威時候，有讀者報料指林作日前在酒吧溝女，更當眾被人贈一巴掌，認真?爆！

主動坐埋身

日前傍晚時分，林作被發現與一男三女到銅鑼灣一間酒吧聚會，愈傾愈熟落，期間一名原本坐林作對面、身穿淺色大褸襯黑絲打扮的妙齡女似乎被口才了得的林作吸引，傾得興起之際突然主動換位坐在他旁邊。見靚女主動埋身，林作當堂雙眼發光，繼續用其三吋不爛之舌撩女，更愈坐愈埋，忍不住哄近對方咬耳仔，舉動親暱，但卻未知說了甚麼，令原本滿面笑容的黑絲女突然黑面，嬲爆爆怒睥林作，繼而出手「啪」一聲兜巴星他，摑到林作頭都側埋，眼鏡差點飛脫，她更大鬧林作：「有錢大晒呀！」

食客O晒嘴

在場食客無不驚訝，林作的同枱友人愕然O晒嘴。黑絲女怒氣沖沖轉身走人，被狠摑的林作反應不過來，只苦笑說：「我係咪可以走喇？」場面十分尷尬！

據知該黑絲女是18歲影壇新人、有「翻版陳嘉寶」之稱的安喜兒，當日她與林作及其合作夥伴陳達仁聚會，同場還有轉戰內地發展的藝人程芷渝及陳達仁旗下公司藝人安采妮。掌摑事件後，坐在林作後方的外籍人士十分愕然議論紛紛，林作定過神後即自己打圓場，向他們表示無事，而同枱的陳達仁及程芷渝亦安慰他，但看來林作今次溝女已搞出大頭佛！昨日記者聯絡林作及陳達仁，但截稿前未有回覆。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon