創造過不少收視神話神、演活《西遊記》孫悟空的張衞健，離巢無綫逾二十年後回巢「母校」拍攝台慶劇《大帥哥》。下午無綫隆重其事在尖沙咀舉行「歡迎張衛健回巢賀壽」，並舉行參演《大帥哥》」簽約儀式，張衞健拖着兩大高層曾勵珍與樂易玲行紅地氈進場，隨後在台上揮筆進行簽約儀式。

簽約似娶兩個老婆

張衞健隨後將記招變成Talk Show，有笑有淚。司儀問樂易玲對張衞健回歸有甚麼感受？她說：「當然嗱嗱聲簽，上一次咁隆重簽字就係同老公結婚。」張衞健笑說：「我當年結婚行紅地氈都係得老婆一條女，今次有兩件。」曾勵珍笑說：「兩條阿嬋（嬸）。」張衞健則大賣口乖讚她風韻猶存。

張衞健續說今次返無綫有三個原因，都是圍繞一個情字，他說：「第一，今年係TVB五十歲，非常重要嘅一年，我嘅演藝生命係呢度在誕生，係呢度茁壯成長，展翅高峰，雖然唔算飛得好高，但出去都無丟架，要感激母校。」

答謝香港觀眾

張衞健指第二是要多謝香港觀眾，雖近二十年工作重心不在香港，但每次返港工作都獲得香港觀眾的歡呼和掌聲，飲茶也不用排隊等位，觀眾又追問他何時返港拍劇，所以希望為香港人拍一部劇，回饋香港市民，張衞健表示：「第三個原因係為咗感謝生命中其中一位重要嘅女人珍姐，珍姐睇住我長大，佢連我TVB溝過幾多條女佢都知，但係佢從來無逼我回巢，今次係重大日子，佢親自邀請，就二話不說答應。

張衞健又講到傾談片酬過程峰迴路轉，曾勵珍笑說：「使乜傾，信我咪得！」他指對方開價時自己「吓」了一聲，但曾勵珍指價錢已很高，他惟有說「哦，咁好啦！」曾勵珍對與相識30多年的張衞健不計酬勞回巢感動不已，更愈說愈激動哽咽，場面感人。