粉絲心痛　軒仔《歌手》風波後多咗人撐

歌手張敬軒及王菀之（Ivana）紅館演唱會開鑼，騷後兩人在後台受訪，講到Ivana在台上穿Deep V短裙跳舞，問到可有給老公Eric So過目？她謂：「冇，通常我着少咗衫，佢會話唔好凍親，跟住一件褸掟堆嚟，所以我平時喺屋企都係樽領或潛水衣多，所以今次做騷都要特登去買件打底。」她亦謂為演唱會減了十幾磅，問到腰圍幾多？她笑言：「低過30吋，對我嚟講唔係輕易。」軒仔亦謂Ivana練舞整到傷患很大犧牲，Ivana謂不覺大犧牲：「但都幾痛，不過食少咗嘢，有番條腰。（返屋企跳番隻舞畀老公睇？）唔會，返屋企係咪要休息下按摩？（叫老公按摩？）少少啦。」

為老公幫手做設計

軒仔亦謂今次開騷很好玩，Ivana謂今次做四面台軒仔畀了她很多貼士，軒仔笑言自己畀山埃貼士，Ivana續謂：「佢教我點搵番正面台，按照佢嘅方法係依然搵唔到。」軒仔都謂自己都行錯位。講到他們穿的衫上figure由Ivana老公設計，她笑言：「我要搵人設計咁方便梗係搵佢，頭先多謝佢都有少少怕醜，但都好開心。」Ivana亦謂今次跟一班好朋友做騷，幸好沒有嗌交：「但有黑面，但都好快friend番，互相包容。」

重提《歌手》　歌迷叫唔好

講到軒仔在台上講番《歌手》一事，他表示：「見到歌迷支持，有啲特登由台灣、馬來西亞等地飛嚟，好想將本身計劃咗嘅歌搬嚟呢到唱畀大家聽，想講一種傳承，想令下一代嘅人都鍾意陳百強、張國榮呢啲前輩嘅作品。（冇得喺節目唱依家唱番？）冇咁諗，當時我畀demo導演聽，話呢首歌本身編好咗，當時prepare咗好多歌，我話唔好嘥，呢個版本好好聽。」講到剛才有歌迷叫他不要再講，怕會再有餘波，他表示：「真係？我聽唔到，第一件事過咗去，第二件事嘅判斷喺觀眾到，我亦唔覺得有嘢需要多作補充，不過都有好多支持聲音，想借呢個場合多謝fans。」

歌迷最心痛

講到有好多內地歌迷因為此事專登來撐軒仔，他表示：「好多，人生就係咁，每件事都有兩面，其實件事之後我微博係突然多咗十幾萬粉絲，instagram都多咗，對於我嚟講今晚係我同Ivana嘅演唱會，冇諗太多。（感動大家支持？）好感動呀，但成件事我諗我冇歌迷咁心痛，佢哋覺得我捲入呢啲事好心痛，所以我唔會留力演出。」Ivana笑言叫軒仔fans順便支持她。軒仔亦謂今次演唱會出現炒飛，他們反對炒飛，故演唱會都特地提早賣飛。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon