楊受成祖兒撐場　軒仔王菀之唱到唔願走

歌手張敬軒與王菀之（Ivana）一連四場假紅館舉行的《The Magical Teeter Totter演唱會2017》來到尾場，獲容祖兒、汪明荃、黃秋生、楊受成夫婦等到場支持。經過一輪勁歌熱舞後，Ivana對剛才抬起她的舞蹈員說：「如無意外，今日應該輕過尋日少少。」

Ending pose躺在地上的軒仔就沒有起身，而穿着裙的Ivana對他說：「你做咩？你唔好喺啲低炒位，我唔方便嚟扶你。」軒仔站起身來說：「我怕生眼挑針！」並表示大家常說女大十八變，但Ivana日日都不同樣：「你今日個妝好特別，一青一紅，你畀人家暴？」之後他叫Ivana跟着他做雙手磨擦的動作，並取笑其造型似烏蠅。Ivana回答：「我隻眼睇唔清楚咪整大佢囉！」軒仔原先想介紹自己的造型師，但被阻止，Ivana說：「我唔會畀時間你抖，你依家即刻唱！」說畢就降落台，交由軒仔獨唱。

將卡啦OK與藝術結合

軒仔表示由首次紅館騷到今次都是開四面台，因為喜歡被觀眾掌聲包圍，又指在生活上及工作上都遇到很多支持自己的人，唱出《找對的人》送給他們。而他坦言在第二場演出已不捨得這個騷，每個細節都是很多人的心血結晶，又謂與Ivana在這個行業是兩種不同的型態：「佢藝術啲，高格調嘅，我就再高格調啲！講笑，比起佢嘅音樂，我嘅商業味濃少少。我哋相識咗14年，一開始都係做創作歌手，因為啲環境轉變，我哋音樂向唔同方向發展，但今次花咗好多心思，將卡啦OK同高格調藝術結合。」並唱出Ivana的《下次愛你》。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon