笑王菀之重磅　軒仔：未見過女士136磅

歌手張敬軒與王菀之（Ivana）一連四場假紅館舉行的《The Magical Teeter Totter演唱會2017》來到尾場，兩人身穿白色衫在台上玩搖搖板及演唱《My Way》，軒仔表示覺得Ivana重咗，Ivana說：「好大打擊，我今日淨係一啖飯，一舊魚，一啖湯。」之後他們叫觀眾估兩人的體重，Ivana解釋說：「我哋開盤有段故，綵排嘅時候我嘅磅數都一樣係136磅，邊有男仔咁輕架！」軒仔笑說：「我冇見過女士係136磅！」Ivana叫現場有136磅的女士拍手，即有很多人和應，她指自己已很努力減肥：「淨番嗰啲係減唔到。」而軒仔就請到場觀賞的黃秋生做見證，軒仔放腳後就向下跌，證明他重過Ivana，他說：「畀你贏一次，肯定做手腳！」

而Ivana準備了一段驚喜表演給軒仔，並叫他坐低聽，軒仔笑說：「你唔好眾目睽睽求婚，你已經係人妻！」Ivana將歌曲《哥歌》中的歌詞改為「軒仔」及「軒叔」等，感動不己的軒仔即站起來與她拖手、抱抱，最後更錫了她的面珠一啖。他說：「呢個好驚喜，但我咩都冇準備，因為見到你我個腦只會諗到『肥婆隻雞甩晒毛』！」又借觀眾掌聲多謝Ivana。之後軒仔問道：「你有咩要交低？」Ivana說：「我未諗到，諗到再WhatsApp你，但我想講多謝你！」兩人唱出最後一首歌《手望》後，就相擁降下舞台。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon