人氣童星唔怕拐子佬　楊鎧凝教自衛術

童星楊鎧凝（Celine）3歲就入行拍廣告，至今拍過嘅廣告多不勝數，當中以為美式快餐店拍攝嘅小紅帽造型同港式快餐店嘅蘿蔔糕廣告最為人熟悉，更被稱為「美心妹妹」。除咗拍廣告，Celine近呢幾年亦進軍電視劇，於2014年拍攝處女作《愛我請留言》，得到好多觀眾認同，人氣好似坐穿梭機咁直線上升，廣告都因而增產唔少。Celine咁細個搵錢已經咁叻，拍咁多廣告，肯定係城中嘅「小富婆」。

而綁匪正正係有錢人最驚嘅敵人，好多有錢人都會請保鑣嚟保護自己。雖然Celine仲未去到有保鑣咁有錢，不過人仔細細嘅佢，思想相當成熟，遇到拐子佬已經識得點樣自保。佢仲將自衛術傳授畀細佬楊澤熙，成個過程畀Celine媽咪拍低，上載上網同網友開心share，網民大讚Celine係個體貼嘅好家姐！

段片嘅拍攝地點喺一架行駛中嘅的士上面，Celine同熙熙坐喺後坐乘客位，有眼利嘅網民見到佢哋兩個冇扣安全帶，原本背脊離開椅背嘅熙熙，當的士開車嗰陣，成個人Chok咗一下，網民好關心佢哋嘅人生安全，留言提佢哋下次坐車要扣安全帶。

短片開始，Celine化身拐子佬，一隻手搭住熙熙膊頭，另一隻手就掩住熙熙個嘴問：「依家我係壞人，掩住你個嘴，你會點？」點知熙熙答佢「死」！激到Celine反晒白眼話熙熙「痴線」！網民笑熙熙好天真，而Celine就好老積、好幽默。之後，Celine就教熙熙千祈唔好驚，大力咬拐子佬嘅手，趁住好時機逃走。Celine話：「係千祈唔好驚喎，你咬佢一忽肉，之後佢就會大嗌好痛，然之後即刻走。你要好似一隻狗，見到壞人就咬，再吐口水落佢度。」雖然咬人同吐口水嘅技倆比較「極端」，不過Celine嘅用意都係想保護細佬。最後，Celine同熙熙咬耳仔，唔知係咪要教細佬做啲唔應該做嘅嘢？當然精髓嘅嘢梗係淨係傳畀細佬啦。網民留言話Celine人細鬼大，好想知佢自衛術嘅精髓係乜添！

網民有話兒

lovxxxy_lxxely_txbi：Celine姐姐好幽默。

pxxvate_jsxg.oxxe：痴線！好得意，個女唔怕俾（畀）人呃了。

lxxy_2xx31xx2_1：Celine扮完狗叫之後個嘴脹起咗好得意。

shxxho_exxhxr：Celine好聰明