天后容祖兒到電台宣傳下月舉行的演唱會，笑言是來宣傳「冇飛賣」的演唱會，問到是否還有好多「飛債」？她謂：「係呀，主要唔係因為我特別受歡迎，而係呢個騷特別少飛，呢個Side track演唱會以為淨係會有die hard fans，估唔到原來都好多人有興趣，有啲人唔知原來係side track，有騷就睇，所以希望啲黃牛可以用番正常價錢放飛，唔好咁猖狂，聽講賣成40倍，不如去搶，太過份。」問到會否希望在大場地開Side track騷？她謂想在演藝開騷就是希望跟大家親密些，可以有心貼心的感覺。

媽媽最開心

祖兒亦謂暫時只有一首歌需要排舞，又笑言她開此騷最開心的是媽媽：「因為有好多歌佢想聽好耐，而且我唔使再咁地獄式排練。」但她亦謂揀歌有難度：「因為要諗點樣鋪排令起承轉合好啲，又諗緊係咪全部都係唱Side track，因為又顧慮有啲唔係die hard fans。（會唔會參考網民意見揀歌？）我有睇過，但有啲好唔Side track，但都幾真正反映民意。」問到可會請嘉賓？她謂：「冇，已經唔夠唱，不過都諗緊好唔好唱下一首半首人哋啲歌，一啲我嘅心水歌，因為呢個叫Secret live，係用音樂嚟講心事啲騷，有啲人哋嘅歌都係自己心水。」問到可會唱男友劉浩龍的歌？她即謂：「等人哋開騷先啦。」問到這些可是她的心水歌？她笑謂：「係...諗吓先。（有冇試過喺公眾場合唱佢啲歌？）冇，有咁嘅需要咩？唱得好聽過佢咁點算？（你哋合唱？）唔好搞咁多。」

細佬愛情經驗老到

而問到她可會挑機好友謝霆鋒，因霆鋒被網友影到在機場跟女友王菲當眾錫錫，她笑言：「都幾Sweet，我諗佢冇諗到會畀人睇到。」問到她可是少在公眾場合做這些行為？她即怕醜笑言：「盡少，盡可能忍住先。（佢哋忍唔到？）睇得出佢哋按捺唔住，真係好愛。（你有冇咁愛？）我就冇，所以先影唔到呢啲相。」至於講到有指祖兒細佬搭上人妻空姐，她謂：「我哋關係密切，同一屋簷下，多少都有講到，不過你哋唔係我屋企人，梗係唔同你哋講，佢咁大個人會處理，佢呢方面比我經驗老到，所以唔使擔心咁多，我都希望佢快啲結婚，騰空間房畀我。（媽咪有冇話想你騰空間房呀？）聽唔到有呢個訴求，細佬結婚同生BB先啦，生咗就當係我。（你幾時生？）40歲前。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon