舊時一齊玩　胡家驊離世克勤感傷心

歌手李克勤到淺水灣出席「2017南區旅遊文化節開幕禮」，他表示自己住在南區：「以前住清水灣，細路喺呢邊返學，依家搬咗去學校隔離。呢個地方好好，要靜有靜，要嘈有嘈，又近海洋公園，我都畀人影咗幾次，有細路嘅家庭就係玩呢啲。」克勤指這天很忙，除了補拍MV鏡頭，活動後還要過澳門，凌晨就和太太飛往英國睇波：「曼聯決賽，聯賽盃，正宗工作時工作，遊戲時遊戲。（真係入場睇？）講得出做得到嘛，睇live冇事啦啩。其實唔關事，一早預咗去。」他指上年看了英國足總盃，太太和他一樣喜歡睇波：「以前選擇世界盃，決賽邊隊對邊隊估唔到，依家知曼聯入咗決賽先搵飛睇。（除咗睇波有咩做？）齋睇，食兩餐飯。（等朗尼？）唔洗啦，之前佢哋嚟中國見過，阿仔同馬達踢過波。」

冇睇黎明演唱會

提到前一晚黎明開騷，克勤稱這次沒去欣賞，又自言快歌不多，未會效法對方開企位騷：「大家類型唔同，我管弦樂比較多啲。佢上次我都有同校長（譚詠麟）睇，嗰場係個幕kick咗喺度。」

「人有啲嘢冇辦法預計到。」

至於吳婉芳丈夫胡家驊離世，克勤坦言很不開心：「尋日我都係睇報紙先知，好愕然。同家驊大咗就好少見，大家都有家庭。我拍TVB劇就成日出嚟玩，嗰時大家都好後生，一班人十幾個，唔使約，卡啦OK老地方見，都玩咗幾年。」克勤稱上次見對方已是一年前在球場，二人認識時對方仍未結婚，吳婉芳當時與克勤同公司，他謂：「嗰時同家驊成日見，大家?仔鍾意玩，鍾意去卡啦OK唱歌，飲兩杯、猜枚，每個男人都有段時間鍾意玩呢啲。」至於有否聽聞對方身體有問題，克勤稱不清楚，亦不方便說，他與校長有提起這事，認為生活仍要繼續。他暫時不會致電吳婉芳：「畀啲時間佢沖淡啲。好突然，冇聽過。我有睇曾志偉個訪問，佢好感性，人有啲嘢冇辦法預計到。」