曾經靚過索過　葉月里緒奈復出又瘦又滄桑

女人有兩大忌，一是歲月催人，二是受過好大的感情創傷，近日復出螢的日本女星葉月里緒奈，就兩樣都經歷過。

41歲的葉月近日相隔兩年重返公仔箱演出TBS日劇《刑事夫婦3》，一向骨瘦如柴的她，在新劇中比以前更加瘦削，雙頰凹陷，加上一把年紀，臉上更添滄桑味。有網友留言對葉月瘦到見骨冇晒星味感到唏噓，有網友更表示以為葉月已退出藝能界，認為個樣瘦到無晒光彩，真係唔復出好過。

其實葉月後生個陣都靚過，迷倒唔少男士，葉月當時係用葉月里緒菜個名演出，由於年青貌美又肯行性感，隨即火速走紅。不過1995年，葉月同有婦之夫真田廣之拍攝電影《寫樂》撻着，發生不倫戀，葉月因而得名叫「二奶菜」，不過呢段不倫戀最終玩完，葉月大受打擊下，於1998年把心一橫拍攝三點畢露的露毛寫真集，由名攝影師篠山紀信操刀，震驚日本。可惜葉月一脫之後無以為計，最後人氣插水，至今仍一沉不起，就算2003年改為葉月里緒奈求轉運，亦無法挽救事業。葉月結過兩次婚，於2004年再婚，同年誕下一女兒，之後便暫別藝能界，於2006年復出演出偵探劇《相棒》。