歌手吳雨霏（Kary）到銅鑼灣出席化妝品牌開幕活動，身穿魚網絲襪配四吋高踭鞋露肚臍赴會，型格性感！她笑說：「呢啲Fashion嘅嘢……真係好耐冇見大家，要花啲心機打扮吓，今年真係衝，會多啲見大家。」

憶蓮參戰不為輸贏

Kary坦言時間過得很快，原來已經兩年沒有出歌：「真係唔覺咁耐冇出過，最近開會都開始緊張，有少少無形嘅壓力，上次隻碟係林憶蓮幫我做，點樣可以做得好過佢呢？我自己要求又高，希望有啲好成績。」

提到憶蓮參加大陸歌唱節目《歌手》，Kary自言是粉絲：「成日都睇住佢，佢唱我喺電視旁邊緊張，希望佢贏啦！（擔唔擔心佢輸咗會影響聲譽？）唔會，我唔覺得會，反而覺得呢幾次佢試咗好多唔同曲風，大家好欣賞佢呢樣嘢，同埋我諗佢參加呢個比賽都唔係想贏或者計較輸贏，都係想攞經驗啫。」

她坦言不夠膽參加，而且不想太大壓力：「我依家好輕鬆，開心就做，唔開心就唔做。其實佢仲需要勇氣，佢已經去到嗰個位，仲要去挑戰自己，其實好勁。希望有一日，等自己再唱好啲先挑戰自己。」

要求高自己拍埋MV

Kary形容新歌比較型格，暫時不會推出慢歌，因為已經有很多：「我想build up（積聚）自己image，想有啲有型啲嘅嘢，fresh啲！（會跳舞？）應該會，所以嚟緊都會忙，要排舞。」相隔兩年再入錄音室，她表示心情緊張和期待。

問到會否為MV出意見？她謂：「我對拍嘢、衫都好高要求，我會睇有冇機會自己拍埋，公司都OK。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon