晒22吋小蠻腰　阿佘玩國語遊戲笑料百出

內地綜藝節目《王牌對王牌》每期都會圍繞唔同嘅主題，而且每次嘅嘉賓都非常吸引，由佢哋通過才藝比拼，進行多場嘅PK對戰。而呢一集就以古裝扮相為題，仲搵嚟女星佘詩曼（阿佘）、蔡少芬（Ada）同內地演員劉曉慶等擔任嘉賓，陣容咁鼎盛，難怪唔少網友已高呼好正喇！

阿佘嘅古裝扮相，最為人熟悉就梗係佢喺《宮心計》裏面飾演嘅劉三好啦，網友都留言話阿佘嘅古裝扮相真係冇得頂，仲話就算相隔八年，阿佘都仍然有當年劉三好嘅氣質。而節目中其一嘅環節就係玩「以訛傳訛」嘅遊戲，仲要用國語玩，對阿佘嚟講就當然有啲難度啦！不過阿佘都好叻咁估到幾個字，但到佢傳番畀內地演員劉敏濤嘅時候，就由「喜歡吃柿子」講成「喜歡吃芝士」引起全場爆笑，但係錯有錯着，竟然咁都畀劉敏濤估中，網友都紛紛留言話阿佘好幸運，咁都畀隊友估中，仲話佢不停講芝士超級搞笑，個樣亦都非常可愛。

另外阿佘仲喺節目中大跳肚皮舞，嘩！阿佘演戲好就眾所皆知，估唔到連跳舞都一樣咁掂，令唔少網友都大讚佢才藝兼備，果然係非凡港姐。阿佘身穿藍色嘅露肚服裝，跳得超級落力，每一個節奏都掌握得好好，難怪網友都大讚佢跳得十分出色。到後面阿佘仲要個人表演，跟住節奏不停搖擺佢嘅身體，仲要大晒其22寸嘅小蠻腰，擺晒專業舞蹈甫士，簡直型到爆呀！所以網友都大讚呢集內容好正，仲話估唔到阿佘跳得咁好，仲要keep得咁fit，亦搞笑話阿佘梗係有蛇腰啦，唔係浪得虛名，真係超令人羨慕，又有美貌又有才華呀！

網民有話兒：

MXX CXXX：呢集內容好正，必睇呀！

KXX TXX：阿佘同當年一樣，都係咁靚。

JXXXX：阿佘講國語「喜歡吃芝士」個樣好可愛。

MXX KXX：阿佘跳舞跳得好好，超出色。

WXX MXX：阿佘梗係有蛇腰啦，keep得好fit。