廖子妤郭爾君帶「你」浪漫遊山陰

最近在影壇嶄露頭角的廖子妤（Fish）與舞台劇演員郭爾君（Alma）到日本山陰地方拍攝ViuTV節目《新世紀山陰戀事》，節目最大賣點是鏡頭以第一身男伴視角出發，兩女與鏡頭互動及玩耍，令觀眾覺得自己正是兩人男友，享盡齊人之福！Fish及Alma在出名靈驗締結良緣的「出雲大社」遇上「你」，之後齊齊到神社、到農場摘草莓又大歎溫泉。

Fish表示此旅遊特輯沒有劇本，以遊戲嘅形式拍攝，兩人要即興度橋，非常考反應：「我同Alma會即興搞爛Gag同做埋啲奇怪嘢，Alma係個反應好快嘅女仔，我已經畀人話我古靈精怪，但我覺得佢係我10倍！可能佢係舞台劇演員，好多即興嘢都做得好好！」講到最難忘景點，Fish表示是最後在「鳥取花迴廊」睇煙花：「等到晚上八點鐘放煙花，一放完冇幾耐就開始飄雪，加埋個音樂，感覺真係好浪漫，永遠都唔會忘記個刻嘅震撼！我有用手機拍到嗰幕，但再睇返都唔夠親身感受嗰時候咁浪漫震撼！所以希望觀眾用第一身睇嘅時候，都可以感受到我哋當時嘅感覺，同我哋一齊睇體驗呢個浪漫嘅山陰之旅。」