勁過FFx！何衍隆拍MV四百蚊搞掂

何衍隆（Royal）和師弟男子組合哈比成員之一劉子禮（Cosmo），早前齊齊出席電影《我老婆未結婚》首影禮，Royal表示平時最鍾意睇喜劇，邊睇邊笑係一種好好嘅減壓方法。對於新歌《有理想有錯嗎？》MV出街後惹嚟唔少負評，有指MV拍攝質素差，師弟Cosmo唔識彈結他又要扮Chok，仲有話Royal嘅唱腔好中學雞等，面對一堆負評，Royal以睇笑片做比喻謂：「當畀大家笑吓減吓壓啦！最想大家笑之餘都留意歌詞，好正能量㗎！」Royal亦表示今次拍MV係一個新嘗試，想用最簡單最隨意同埋低成本嘅方法去拍，希望話畀大家知只要有心去做，面對幾多問題都一定做得到，最後MV成本淨係用咗400蚊，成功打破當年MK女子組合FFx嘅神曲《SUGAR BABY》MV用900蚊製作嘅成績。