現年35歲的無綫花旦黃翠如與39歲的男友蕭正楠相戀以來一直甜蜜，已低調同居的二人雖早已為結婚一事有共識，但據知Edwin有感將迎接40歲，加上認為女友再不生B便要面對高齡產婦更大的風險，故也有向女友催婚，所以二人才鐵定將婚事提前進行。由於翠如正受無綫力捧，加上與洪永城的「螢幕情侶」形象為粉絲受落，為免令外界對這對「洪黃配」假想情侶的幻想幻滅，翠如與Edwin惟有將婚事低調地秘密進行，二人近日雙雙向無綫於8月請了一個悠長假期，準備出走瞞婚去。

樂易玲：公司批咗

翠如連日來被發現於Edwin寓所出入，儼如「女主人」，而將踏入人生另一階段的Edwin亦心情靚絕，不用工作的日子，也樂得當柴可夫接送翠如。日前下午3時許，Edwin獨自離開寓所到停車場攞車，期間警覺性甚高不時四圍望，更索性把車駛至最近大廈的出口，未幾見翠如落樓，並匆匆上車離開，Edwin載翠如到荃灣後，翠如便等轉搭無綫外景車開工。而另一日晚上翠如要開工，Edwin亦只埋男人堆，約好兄弟曹永廉飯局，阿廉更細心到Edwin寓所載他，再到長沙灣晚飯密斟。

對於Edwin與翠如齊齊請長假一事，據知亦觸動無綫高層樂易玲及曾勵珍的疑心，曾向二人當面問個明白。記者向樂易玲求證，她只說：「佢哋係喺8月攞假，公司都批咗！（係咪結婚？）唔知呀！等我再問吓佢哋！」

「四角關係」呷Tony醋

其實翠如與Edwin自公開戀情以來外間甚為受落，但翠如與「好兄弟」洪永城（Tony）的「螢幕情侶」形象亦為網友喜愛，雖然Tony已有正印女友唐詩詠，但這段「四角關係」仍不時成為外間談論對象。近日翠如與Tony孖住合作無綫新劇《我瞞結婚了》，飾演一對為事業而隱瞞已婚的夫妻，二人於鏡頭前的默契及互動，令觀眾非常喜愛，但因劇中不乏親熱鏡頭，令正印男友Edwin睇到眼火爆，日前更急急於社交平台上載女友靚相來宣洩主權，引來不少網友留言着Edwin早日把翠如私有化迎娶回家。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon