識咗四年！可宜認戀燈膽王子

有線前主播可宜向來低調處理感情事，但日前竟於社交網上載一張與一名男士頭貼頭的親密合照，細問之下，可宜大方承認對方是男朋友，名叫Brian，她透露二人交往了一段短時間，對方從事燈膽生意，是名副其實的「燈膽王子」！

講到相識經過，可宜甜笑表示：「我哋識咗四年，啱啱開始，我相信timing好重要，你知我不嬲感情好低調，但點解呢次咁公開？咁我覺得都到一定年齡，同埋遇到對嘅人就好順其自然，冇諗咁多，現階段當然好開心，大家係朋友相處好耐，好多方面都好夾，佢都喺外國生活好多年，所以同我一半鬼妹背景好夾，同聲同氣，life style同飲食又一拍即合。」

至於可有結婚打算？可宜笑言：「啱啱一齊好似快咗啲喎，咁結婚係我人生規劃會發生嘅事，但慢慢嚟，順其自然。」她又言就算婚後都會繼續工作：「好多幕前女仔婚後繼續兼顧事業，仲成功開拓另一市場，希望我可以做一個事業愛情兩兼顧嘅女人。」可宜又笑指當前任務是要減肥，因為另一半喜歡飲飲食食，結果增磅不少，莫非這就是傳說中的幸福肥？