陳柏宇預告結婚生B後退出樂壇

歌手陳柏宇（Jason）將於七月與女友符曉薇拉埋天窗，忙於籌備婚事的他表示現時目標是結婚生仔，更坦言結婚生仔後有機會不再唱歌：「我家庭一定行先，如果我家庭要去加拿大時，我又唔想丟低佢哋喺嗰邊自己喺香港繼續事業，如果有得選擇，我希望畀多啲時間喺屋企上。（結婚後會去加拿大？）唔係結婚後咁快，係生埋小朋友後，等佢哋大多少少，我會想佢哋喺嗰到讀書，但到時再決定，總之唔會丟低佢哋，起碼有十年後。」

講到他與女友拍拖五年多，問到何時有結婚想法？他謂可能是兩年多前：「其實冇話突然一刻想結婚，而係慢慢愈嚟愈close，大家已當對方係家人，自然就去plan。」

為對方而改變

Jason跟女友感情穩定，不時在網上放閃，坦言兩人有因為對方而改變，其中女友改變了他幫人的心態：「以前我係會選擇而幫，會諗值唔值得，但依家會幫咗先，有問題先算，但依家佢反而做番個中立角色叫我小心啲，例如我借錢畀人，佢會係咁意提點兩句，但我覺得冇得去小心咗人先，唔想抱住人哋想呃我嘅心態去睇件事。」而他則改變了女友處事方法：「佢成熟咗，有時佢同我傾公事，或同事、朋友間嘅拗撬，我以第三者角度去睇，可以畀到好多意見，佢好多時都會接受我嘅意見。」

唔記得女友生日

Jason亦自爆原來兩人都試過「吵架」：「例如我試過一次唔記得佢生日，其實嗰次都唔算嗌交，只係我畀人單方面言語上攻擊，佢嗰次好嬲，嬲咗我一日，所以我用時間同誠意氹番佢，陪咗佢去長州一日。」他謂兩人很少吵架，皆因他不愛吵架：「我鍾意講道理，其實某程度上係仲煩，但呢個方向會尊重啲，嗌交好多時會夾雜攻擊，但討論只係講番個事實出嚟。」