經典重溫！張兆輝演乜似乜冇得輸

張兆輝同陳松伶主演嘅無綫新劇《全職沒女》，叫好又叫座，觀眾都大讚兩個演出抵死搞笑！myTV super仲好有心思，將張兆輝入行以嚟，最令觀眾留下深刻印象嘅角色嚟一個大串燒，網民都話覺得歲月如梭，不過就驚訝係54歲嘅張兆輝，入行多年外貌上都冇咩改變，稱佢為新一代「凍齡男神」！

動作戲都ok

要數九十年代最令觀眾記得，當然係《情濃大地》入面做嘅關家二少，張兆輝一舉手一投足，都散發住富家公子嘅氣質，當年令大批少女神暈癲倒。之後《廉政追緝令》入面嘅廉Sir勇猛無敵，片後中一節追車嘅情節，張兆輝奮不顧身咁趴喺車頂，險象橫生，呢啲咪叫專業囉！

古裝又得

時裝劇有型有款，咁古裝又點呢？張兆輝喺《圓月彎刀》入面飾演風度翩翩柳若松，成個造型勁有大俠嘅風範！而要數最經典，當然不得不提《無頭東宮》中嘅皇上啦！張兆輝由年輕扮到老，將皇上嗰種戇直嘅神態，演繹得淋漓盡致，仲有網民話：「我諗無頭東宮畀我嘅影響太大，令我每次見到佢都覺得佢係負心漢！」可想而知，張兆輝嘅演出有幾引人入勝！

網民嗌羨慕

其實張兆輝除咗做大俠、皇上得心應手之外，做一啲市井、升斗市民一樣難佢唔到！佢喺《結．分＠謊情式》嘅小男人孫家安，一方面要面對中年危機，一方面要應付老婆商天娥，張兆輝演得絲絲入扣，將小男人嘅難處完全表演出嚟，講出唔少男人嘅心聲！去到依家熱播嘅《全職沒女》，54歲嘅張兆輝依然有型有款，扮起鑽石王老五，完全毫不費力，真係羨慕死唔少中年發福嘅男士。

網民熱話

Stxxxxm 廉政追輯令最型

Huxxxxxxg 我諗無頭東宮俾（畀）我既（嘅）影響太大，令我每次見到佢都覺得佢係負心漢

Shxxxxxxn 佢係我嘅超級偶像

Aixxxxxg 黃金十年

Hexxxxxxg 完全冇變！凍齡男神