直落兩局大敗！Stephy排球賽鎩羽而歸

藝人鄧麗欣（Stephy）帶領排球隊Loey參加「第37屆全港公開排球錦標賽2017」的女子乙組賽事，身穿螢光粉紅色波衫、淡妝的Stephy非常搶眼，不過她與隊員們在比賽中頻頻失誤，即使她不時瞓身救波，亦未能挽回劣勢，球隊在首局比賽中以11比25落敗。到第二局比賽，Loey亦繼續落後，被對手以25比15擊敗，最終輸掉第一場的乙組比賽，而Stephy面上亦難掩失落情緒。

有信心升甲組

受訪時，Stephy表示因爲是乙組首場賽事，所以大家比較緊張，而且今日的對手很強，會有壓力：「對面打得好好，因爲有經驗，同埋好有實力，我哋輸經驗囉，你見球證差唔多吹咗我哋二十次掂網呀、double（連撃）嗰啲，其實中間我有少少忟，忟自己、忟隊友，但冇辦法啦。」又指這次是打計分的循環賽，所以每一局都很重要，最高分的兩隊才能升上甲組。問到可有信心？她指信心一定要有，但今場輸的分數較多，會有擔心，唯有在之後的比賽中好好表現：「教練一定鬧㗎喇，依家鬧都唔鬧，嬲得滯走咗去，但冇辦法，唔係贏就係輸。」又指球隊一直有很多訓練，但訓練與真正的比賽不同，正如藝人上台表演一樣：「好多時要睇即時嘅表現，我哋係要累積多啲經驗，一去到呢啲場合一驚，就會自己失誤好多，失誤多又會冇信心，咁就難搞啲。」問到她可會向台灣同性密友排球教練小牛請教？她笑說：「我依家就想打畀佢啦！其實請教都冇用，排球要睇一隊人，所以真係要練習多啲，轉變吓個心態。」

有興趣做打女

而Stephy坦言在這幾個月的比賽期間要拍戲，她希望能出席比賽之餘，亦有良好的狀態：「希望兼顧到，做嘢之餘都keep到個體能，盡量配合練波嘅時間，辛苦啲囉，但唔緊要嘅。」問到現時可有簽新公司？她笑言仍是自顧人士，有新動向會告訴大家。提到有指她會加盟古天樂公司旗下做打女，她說：「我都睇過報道，唔知點解莫名奇妙出咗咁嘅報道，但冇啲咁嘅事。（想向打女發展？）有㗎，但要睇機緣，有機會我都有興趣嘅。」至於可有探望過好姊妹楊愛瑾（Miki）剛出生的囝囝？她說：「嚟緊有，希望我五月中開戲之前可以去探到，如果唔係開咗戲我唔喺香港又冇時間。」又指雖然做母親一定辛苦，但Miki性格樂天，相信對方很享受湊B的樂趣。