《玄學星相》：鄧兆尊同Carmen最夾

已故名伶新馬師曾嘅兒子鄧兆尊嘅感情生活向來精彩同令人關注，皆因佢同時有三位女朋友，仲不時一拖三出街，「一家四口」相處得非常融洽，簡直係男人之光，更被封為「港版Johnny嗒」！而今集堪輿學家雲文子就喺東網巨星節目《玄學星相》，以玄學角度全面分析鄧兆尊嘅桃花運同性格。

三女都非常旺兆尊

鄧兆尊雖然年屆50但依然魅力非凡，佢嘅感情生活仲備受全城關注，皆因佢唔單止有三位女朋友Carmen、車厘子同Claire，仲同佢哋相處得非常融洽，雲文子就話兆尊嘅桃花運十分旺盛：「以奇門遁甲推算，佢個命宮裏面有『乙奇』帶呢個『青龍』生旺，即代表多妻格局，夫妻宮會較強，佢唔止桃花運會旺，佢嘅正桃花亦都會非常之強，所以三位女士都願意心甘情願分享一個男人。」雲文子亦指三位女朋友同兆尊嘅緣份都好厚，因為三位女士都非常旺佢，而同Carmen嘅命格就會最夾。

同祥嫂嘅關係比較難搞

至於兆尊同媽媽祥嫂嘅關係一向都麻麻，今年兩個嘅關係會唔會有咩變化，都令人注目，雲文子就表示兆尊同祥嫂今年嘅關係都係比較難搞：「其實見到佢同祥嫂今年嘅格局相沖，所以呢一年絕對唔適宜做任何比較進取嘅行為，拉近大家之間嘅關係，特別喺農曆嘅五月同埋十一月，二人嘅關係容易變差，會比較難搞。」

轉行做生意？

而最近就重播當年處境喜劇《皆大歡喜》，兆尊就憑劇中「高爾康」一角令人留下深刻印象，最近佢仲拍攝網劇一止戲癮，雲文子就話：「如果佢把握到農曆嘅八、九月，對於佢日後嘅演藝生涯會有好大幫助。」雲文子仲話今年兆尊會有其他方向嘅發展，如果做生意仲會唔錯。想知道鄧兆尊更多？就要Click入東網巨星睇《玄學星相》就更啱Feel！