預告三點式上陣　江若琳出熟女寫真

歌手江若琳（Elanne）到電台宣傳新歌《小燈塔》，她表示收到很多粉絲讚這首曲有鼓勵作用，想不到自己原來還有少少影響力，而現正開始籌備下一首歌，主題是愛情。出道十年，她希望可以今年9月底開騷：「因為我9月尾30歲生日，好似有雙重意義，但香港啲場地真係好爆。（想喺邊度開？）麥花臣，呢種細型場地可以拉近同歌迷嘅距離。」

20至30歲好精彩

Elanne還透露今年將有一連串計劃，除了開騷出碟外，亦想出一本靚相散文集：「20歲嗰陣出咗本寫真，但係冇嘢睇嘅，想30歲時都出本。（出寫真？）我唔出寫真係因為依家啲女仔出寫真身材好好，我咁樣殺出嚟自己都唔好意思，所以係想靚相加散文集，因為我人生20歲出咗青春寫真，30歲想出輕熟女相集，希望40歲可以帶住兩個仔女影番本，如果可以做到就好，我依家都成日回味20歲嗰本書，覺得30歲值得紀念，因為我20至30歲好精彩。」

吸引潛水愛好者

問散文會寫甚麼？她表示：「講人生經歷、人生觀。（愛情觀呢？）都會，自己嘅故事都會寫。」並計劃出埠影相。問造型可會接受到三點式？她笑言：「都得，健康就得，我都會着三點式游水，想紀錄一下30歲女仔嘅生活狀態，我都鍾意潛水，可能會着潛水衣，由頭包到落尾。（咁會趕客？）咁可能我吸引到班潛水愛好者。」

講到她與前公司的官司糾紛，她謂現正進行中，笑言沒有新進展：「可能你三年後問我都係咁答，因為始終呢啲都係關乎政府架構嘅嘢。」