陳豪問「有味問題」　搞到阿田冇聲出

無綫藝員陳豪、歐陽震華（Bobby）、田蕊妮及姜大偉雲集西環一間懷舊茶樓，為無綫重頭新劇《誇世代》拍攝外景，劇情交代Bobby被太太阿田捉去品茗，卻遇上爸爸姜大偉及歡喜冤家陳豪。鏡頭前Bobby與陳豪交惡，不過私底下卻默契十足，夾計大講有味笑話，將矛頭指向阿田！

當提到被安排於劇集內騷肌，陳豪笑謂：「拍咗一場嘞，睇吓監製使唔使重拍。我同阿聰（張繼聰）住埋同一屋苑，可以約去會所健身。阿聰好勁，跟佢學到好多嘢，佢甚至連一條肌肉上半截同下半截點操練，都有研究。」Bobby聞言即轉向阿田問：「不如妳返屋企問吓妳老公（杜汶澤），男仔最想操邊條（肌肉）吖？」陳豪即「幫拖」謂：「係想玩粗邊條呀！」搞到平日膽生毛兼伶牙俐齒的阿田頓時語塞，不懂反應。

阿田踢爆Bobby好為食

阿田當然不會就此讓Bobby「得逞」，踢爆對方饞嘴非常﹕「頭先我搭lift上嚟，淨係聽到個經理好緊張咁喺度講，話歐陽震華要食點心囉！有專人服侍呀。」Bobby即靦腆回道：「咩呀？嚟呢啲地方梗係想食點心啦，點知原來師傅已落場，我梗係叫經理幫吓手啦，況且我留咗肚，唔算好為食啫！」原來「咖啡王子」陳豪亦對中茶情有獨鍾！「其實我都鍾意同阿哥去深水埗，搵啲最舊式嘅茶樓叫山竹牛肉，每人送碗白飯呀。」

姜大偉李家鼎對打一take過

另外，姜大偉於戲中與李家鼎有洪拳對打戲，二人寶刀未老一take過，就連阿田亦大讚﹕「佢哋就打得好睇啫，我喺戲內都跟老爺（姜大偉）學嘢，有場打戲唔識借位及用力，打完兩隻手臂紅晒囉。」