天王有後?城城認雙喜臨門:梗係啦
新婚的郭富城跟大家分享喜悅,聽到大家連聲恭喜,人逢喜事精神爽的城城說:「多謝大家關心及所有人對我祝福,我係開心嘅。」城城坦言上年聖誕節已經訂了婚,因為工作關係,將結婚事交由家人及工作團隊幫他去搞,他說:「我覺得係好正常嘅,唔係咩秘密,係順其自然去做,我同屋企人嘅意願係低調,所以喺今次大日子我都希望保持一貫作風,都係低調,多謝大家遙遠祝福同體諒。」
望開枝散葉
問到城城是否有好消息要公布,因為一直有傳他是雙喜臨門,傳聞方媛已有喜?城城說:「我都同大家講咗,我覺得屋企人好低調,尊重屋企人,(係咪雙喜臨門?)梗係啦,個囍字係有兩個喜,仲唔係雙喜臨門,係兩喜字合成,(邊雙喜?)我會努力,總之有好消息,我就同大家分享,(係咪未夠3個月唔講得,怕BB小器?)呢個問題真係一個好嘅問題,畀啲時間我,適當時候就會同大家分享,始終我一直都講,人生大事係因為我希望媽媽睇到我結婚,我覺得喺成個婚宴上面,我睇到媽媽係開心,感動,我覺得呢樣係我比佢更加感動,所以下一個步驟,或者下一個人生計劃,得到大家嘅祝福,上天畀到一分禮物我,媽媽就可以喺有生之年都可以抱到孫,作為一個仔咁多年都希望喺適當時候做適當嘅事,我依家係做咗成家立室,下一步一定係開枝散葉。」