親述車禍經過　羅孝勇腰骨折：好Crazy！

歌手羅孝勇（Sheldon）昨日在旺角染布房街交通燈號位過馬路時，遭一輛私家車疑衝燈撞到，受傷後被送入廣華醫院，Sheldon昨晚做完腦掃描，今早再照X光，他接受東網訪問時聲線有點攰地說：「意外發生後收到好多朋友、屋企人同關心我嘅人send message慰問我，所以我都逐一回覆報平安，我OK嘅。」

私家車疑衝燈

Sheldon表示醫生指他條腰的椎骨位置骨折，應該要休息一個月，讓骨折位置自動愈合好番，他說：「照咗腦掃描，我個頭冇事，清醒嘅。」回想被車撞到一刻，Sheldon覺得自己好好彩，他說：「好感恩！件事好crazy，覺得自己好好彩。」他詳述當時與女朋友王丹妮正在紅綠燈位過緊馬路，他說：「我行得前啲，女朋友見到我畀車撞，即刻報警，都有途人報警，甚至個司機自己都呆咗一陣，我記得佢都有報警。當時因為落緊雨，啲途人好好心，好多人擔傘幫我遮住，我要多謝佢哋。」講到該私家車疑衝燈將他撞倒，他說：「我都唔太清楚點解佢會咁，我係等到行人綠色着咗我先過。（向該司機追究索償？）依家我主要做晒身體檢查先，睇吓咩情況先。」

母從澳洲即飛返港

出事後，Sheldon第一時間通知澳洲的母親，羅媽媽擔心得漏夜飛返港，今早到港後會直到醫院探望兒子，Sheldon表示會考慮轉私家醫院，但要等母親同醫生決定。