44歲孫耀威話要生多啲：我都仲OK！

44歲歌手孫耀威（Eric）出席加盟新唱片公司記者會時，宣布與拍拖8年的女友陳美詩（Macy）已在美國註冊結婚。

期待老婆着婚紗

問到何時舉行剩下的儀式？他指未決定，有想過在外地玩完後返港或直接在香港搞：「最近去咗澳洲影相，嗰次真係去做慈善活動嘅，但北京經理人幫我哋安排埋去個邊影相。」問到在求婚後及早前去澳洲之前，可有影婚紗相？他說：「求婚後有次去美國做嘢有順便影嘅，但上次去澳洲先係正式影嘅，我都未收到，今個星期應該會收到，我都好期待睇老婆着靚靚婚紗。」

共渡患難

至於為何選擇現在才公開婚訊？他指因為現時想籌備婚禮，所以想告訴大家：「之前做咗一半，仲有一半未做，所以今年決定的起心肝，呢幾年多得老婆幫手，例如之前生意唔好，前年自己受傷，流好多血，仲休克差啲死，入醫院多得佢喺身邊陪住我，呢個人對我好重要，多謝佢一路嘅支持。」

生B順其自然

Eric表示希望今年能夠完成埋婚禮，因為搞酒席好頭痛，他說：「影婚紗相都已經好辛苦，我哋去咗澳洲啲森林、懸崖峭壁都影咗幾日，每日晨早四點幾就影，尋日喺香港影埋。（再一下步想生BB？先公布結婚？）我都想生BB，我都做過檢查，我都仲OK，Macy都OK，本身都驚自己忙，影響到質量，但檢查過係OK嘅，但唔會點plan，順其自然，有就有，希望可以生多啲。」另外，現場播放他的新歌《It's My Day》mv時，老婆Macy亦有出現在MV之中。