完敗！祖兒同阿Sa日本鬥食輸晒

天后容祖兒到深圳出席動土儀式，祖兒表示剛與媽媽和蔡卓妍（阿Sa）去日本：「阿Sa狂食！佢淨係嚟兩日，之前做周柏豪演唱會，我去先，佢Join我，我盡量陪佢去佢想去嘅地方、食佢想食嘅嘢。」祖兒笑言大家勸她不可跟阿Sa鬥食量：「佢話我輸梗，你睇大嬸嘅身型就知後果幾咁慘烈，我冇理，照同佢食完晚餐，好飽，佢仲食多一盤壽司做宵夜，同好多螺。」祖兒指阿Sa很瘦但唔識飽：「我第一日見到佢，佢話可以食到成個人落肚。我第一次同佢去旅行，見識到佢嘅真功夫。」祖兒指媽媽在日間需要多些時間準備，所以晚上才一起吃飯：「我唔想佢行得太多街，所以安排做Spa畀佢，等佢Relax啲，舒服啲。」她坦言想再去旅行，下次想自己去：「我未試過，覺得係好大嘅體驗，可以係backpack，但總之係一個人感受，唔使好多計劃，純粹係隨心。（去邊？）未諗，啱啱先返，唔好咁過份。」

一直清楚自己條路

提到電影《29+1》，祖兒自言與戲中的周秀娜有點不同：「我30歲嘅時候已經好清楚自己條路，就算我唔清楚，後面都有道力推我行，我冇得諗好多，反而依家大個咗，有多少少時間諗番，當時畀人推住行都好，我唔鍾意諗，鍾意人話我聽應該點做，見到個目標去努力。」她認為每個女生的性格都不同，從這套電影可以看到彭秀慧下了很多心機，令她知道很多女仔的30歲都是一個大挑戰，無論事業、家庭或健康方面：「年輕嘅時候太多選擇，有人選擇去玩、拍拖，或者埋頭苦幹做嘢，我就冇選擇，公司一路推住我行，我回想番都感謝公司。如果依家你推我行，我未必行得到，要細個有咁嘅魄力，再加上佢哋嘅動力，大家配合，呢個係我人生幸運嘅一個點。」

現實中不會愛得太遲

問到是否愛得太遲？她說：「愛得太遲係屋企人，因為中間有一幕係周秀娜太忙，工作好好，但爸爸就患咗腦退化。（你現實生活有冇愛得太遲？）冇，我都好知道呢個道理。（愛情？）我冇呀，一路都喺度。愛情唔到自己控制，多過一個人嘛，係兩個人嘅事，我唔覺得自己好遲，有啲嘢係唔遲又唔早，時間啱啱好。」