46歲的演員陳松伶（松松）相隔10年，再效力無綫，接拍劇集《全職沒女》，被安排與張兆輝擦出「愛火」，外界反應相當受落。談到今次「復出」，松松笑謂：「未試過演相差咁大嘅角色，畀劇本吸引咗。（容易適應？）可以嘅，拍得算輕鬆，休息時間算足夠。今次同一班後起之秀好似張振朗及陳瀅等合作，覺得佢哋好用心去演，直至依家我哋都有保留group chat溝通。」

老公管到實

戲中扮演沒女的松松，現實生活中卻幸福滿瀉，她更自爆與老公張鐸有協定，就是彼此即使工作需要，每次分開也不可超過兩星期：「所以今次返嚟拍劇，機票錢好貴。其實好驚佢嚟探班，因為佢會管我嘅作息時間同飲食，一到凌晨12點佢就會話收工啦，夠鐘瞓覺嘞。」

曾因年齡差距拒絕老公

松松「投訴」的語氣，實質卻sweet到爆。談到年紀比她少8歲的丈夫，她禁不住甜笑謂：「佢好似我爸爸咁，成日教我注意養生，喺北京生活嘅時候我哋以食魚、餃子，及煲花膠湯作調理。我老公連我護膚都要理，我好懶敷面膜嘅，差唔多要佢遞到埋嚟先搞，但我喺屋企忽然會見到個敷住面膜嘅男生飄過，佢敷得好密吓。」松松坦言當初曾因顧慮年齡差距而婉拒丈夫的追求：「不過後來發覺佢好認真，係個傳統中國男人，重視孝道、對老人家好好。」

唔得閒諗領養

松松表示自己刻下香港、北京兩邊走，加上在內地成立了與丈夫聯名的演藝公司，未來工作將更加忙碌。近期對外表示有意領養小朋友的她坦言：「初期係有討論過（生育問題）嘅，依家我哋都有親人要照顧，所以冇再諗嘞。」一年有一半時間留港的她，原來生活相當貼地：「喺香港我會篤魚蛋、搭巴士、逼港鐵，覺得好好玩又方便。（唔介意畀人行注目禮？）有問題，咪笑吓、say hello囉。」