新地獄廚神!張彥博整窩夫險燒廚房

20170506
東網電視
更多新聞短片
阿博今次真係失威。
藝人張彥博早前為無綫節目《社企打工王II》化身做一日侍應,仲要喺短短八個鐘內學識洗碗、落Order、燒乳豬、整窩夫同上菜,真係一啲都唔簡單!雖然只係錄節目,但阿博同工作人員完全冇「揸流攤」,阿博夜晚仲要親身服侍客人,對佢嚟講真係一個大挑戰。
不過睇番當晚表現,阿博上菜時有啲雞手鴨腳,仲差啲因為差錯腳而將食物倒瀉,好彩平衡力驚人嘅佢最後冇事,加上佢上菜時盡現暖男本色,相當細心又體貼,令到女客人大為讚賞 ,仲大讚阿博係「社企花美男侍應」。而阿博平日都好少下廚,當導演要求佢炮製窩夫時,佢雖然有姿勢,但似乎冇咩實際,最後因為記錯熄機時間而整燶窩夫,冒出大量濃煙嚇窒在場嘅工作人員!
講到做一日侍應嘅感受,阿博話自己以前有喺餐廳打過工,所以啲嘢唔算話好難做,佢話:「但係窩夫真係好難整,啲漿嘅厚薄度啦,整嘅時間啦,轉部機嘅次數啦,樣樣都係學問。搞到咁論盡,我都狂向啲同事Say Sorry,好彩佢哋冇怪我,但就笑我係男版地獄廚神囉。」