撒嬌女人最好命　王菀之泰國嗲爆老公

現年37歲嘅歌手王菀之（Ivana），一直都嗲聲嗲氣迷死人，佢2015年就同「Figure王」Eric So（蘇卓航）結婚，6月就30有8嘅Ivana曾笑言有想過當媽咪，不過要跟隨老公意願，個個都好期待二人嘅愛情結晶品誕生！

不過喺佢哋「搞出人命」之前，Sweet到爆嘅二人最近就去咗泰國旅行，Ivana仲好鬼冤氣咁上載咗段佢嗲爆老公嘅片上網，佢仲「事先聲明」叫大家小心佢嘅嗲功㖭：「考慮咗一陣，決定都係post，因為我自己都睇得好開心（...並未徵求佢（老公Eric）同意...? 同埋唔好意思，語氣係過份嗲咗少少，畢竟條片原本只屬私人珍藏）！ 不過我以賽車手身分同大家講，Tuk Tuk（篤篤車）有時開得好快㗎~」

講到咁，即刻去片先！條片一開頭，就見到Ivana同Eric坐緊Tuk Tuk，Ivana就話佢哋返緊酒店，不過佢就畀Tuk Tuk嚇親，因為架Tuk Tuk開得太快，搞到佢個心肝仔都跳咗出嚟，仲不斷Chok聲撒嬌：「好似好危險咁嘅啲Tuk-Tuk，好快喎～～～我唔鍾意呀～～～～要叫佢慢啲～～」嘩！果然係撒嬌女人最好命，Eric個樣都好受落，唔知係咪平時Ivana都係咁樣同佢談心嘅呢～～～～