相識逾二十年　米雪難忘曾守明助人為樂

無綫藝人曾守明上月在廣州登台期間突然離世，享年58歲。曾守明中午在紅磡世界殯儀館出殯，隨後移往歌連臣角火葬場進行火化。

前來送別曾守明最後一程的圈中人包括米雪、鄧梓峰、袁潔儀、馬蹄露等。米雪接受訪問表示與曾守明相識逾二十年，大讚他樂於助人，她說：「最初識守明係喺民安隊，之後就喺公司拍嘢，佢個人好好。（有咩最難忘？）佢成日講揸飛機、做輔警樂趣，佢好肯幫人，喺啲直升機會見到佢都見佢喺度教緊人。（最後一次見面幾時？）上年有啲內地劇、電影工作想搵佢，但見佢好瘦，所以叫佢休息吓先。（阿嫂情緒平伏未？）見到佢情緒都好穩定，因為佢唔想人擔心，呢樣嘢要好好向佢學習。」