母親節唔收貴嘢　肥媽最想收廚具煮好西

【特約報道】藝人呂慧儀、肥媽昨日於屯門V city出席「阿媽你好Yeah」活動。而Kawaii、張啟樂及關伊彤則齊齊擔任司儀，新鴻基地產代理有限公司租務副總經理孫雅茵小姐亦亮相支持。期間慧儀及肥媽向觀眾送花預祝母親節，肥媽更大晒廚藝炮製餃子及甜品益街坊。

肥媽於受訪時透露母親節將下廚慶祝，更笑言想收廚具作禮物：「會食飯但要我煮。（冇母親節福利？）仔女返嚟食飯就係福利。（有禮收？）應該有，我鍾意廚具，好似陸浩明買咗水晶畀我，我都畀番佢，叫佢送畀女友。」

早前聲言不再開演唱會的肥媽就表示有意與李麗霞（黑妹）舉辦「棟篤笑說唱會」：「我話book咗場先算，暫定11月伊館搞。我講嘢直頭唔使稿，分享吓登台趣事同唱新歌，好玩先會做，演唱會就唔做喇。」

同場呂慧儀被問到有否問候早前因拍攝《誇世代》而中暑入院的歐陽震華？曾與對方拍攝劇集《一屋老友記》的她稱會傳短訊問候，更會叮嚀《誇》的助理編導小心照顧對方！談到慧儀於熱播處境劇《愛回家．開心速遞》中與馬貫東（十仔）談情？她笑言十仔深受囝囝蟹籽的喜愛，故一家人睇二人的談情戲亦不會詐型：「馬貫東好識收買我個仔，買咗架車仔畀佢！」