新一代萬能Key!陳瀅畀人唱到爛

20170509
東網電視
更多新聞短片
陳瀅真係咩歌都key到!
近日網上流出「陳瀅」、「萬能Key」呢兩個關鍵字,即係話陳瀅呢個名可以融入唔同嘅歌詞裏面,仲要係零違和感!例如吳業坤主唱嘅《原來她不夠愛我》原版歌詞係「原來她不夠愛我 原來我坐後備座」,就可以唱成「陳瀅她不夠愛我 陳瀅賜我後備座」,令到宅男女神陳瀅變得更有幻想性!
由藝人譚永浩 、盧峻峯同董敬文一齊創辦嘅facebook專頁「喂 霞姨」日前就上載咗一條名為「霞姨音樂劇場」短片,6分半鐘嘅片段中,同樣用番歌詞萬能Key「陳瀅」唱情歌嚟連貫整個故事,結果短短兩日就吸引17萬人次瀏覽,連同樣係宅男女神嘅簡淑兒都有化身做網民留言讚好。
扮哪些年
片段一開始,盧峻峯着住背心扮演台灣藝人柯震東嘅經典電影角色,佢扁晒嘴話自己好幼稚,所以好鍾意靚女陳瀅,而陳瀅現實中嘅好姊妹劉佩玥就扮演柯震東拍檔陳妍希,鬧盧峻峯「FF」自己同陳瀅一齊係「大笨蛋」,搞到盧峻峯喊晒口咁話自己失戀啦!
呢個時候,譚永浩同董敬文現身安慰好兄弟盧峻峯,「失戀」嘅盧峻峯即刻爆喊唱:「那一刻陳瀅回眸 原來是我妄想裏的那點綠洲」,翻玩麥浚龍首經典金曲《沒有人》,跟住董敬文就拎陳瀅本寫真集出嚟送畀盧峻峯,仲不懷好意咁唱:「和陳瀅深深一吻來代替講話好嗎」,搞到盧峻峯即刻開心番晒,仲摟住本寫真集瞓覺,又興奮大唱:「陳瀅留得住高潮 一招了太少」,點知喺呢個時候,董敬文突然宣布女神陳瀅拍拖了,令盧峻峯再度心碎!
真.陳瀅現身!
睇到呢度,網民都問究竟「真.陳瀅」幾時先會出場?說時遲那時快,真陳瀅終於出場啦,佢仲同盧峻峯合照添,不過呢個唔係最大亮點,亮點係最尾劉佩玥同譚浩文拖住手宣布一齊咗,搞到網民大嗌:「Oh my god!」唔使激動住,音樂劇場嚟架咋,不過網民都大讚呢條片好有水準,話有歌聽之餘,仲真係搵到陳瀅本尊客串演出,仲話希望佢哋三個可以多啲搵陳瀅合作呀!
網民有話兒:
KeXXy LeXXXg :佢個名堅百搭係(喺)任何歌 btw佢個樣真係好索
PoXX To:好洗腦哈哈
LXk LXkyo:陳瀅你傷我心 陳瀅你使我再下沉~~
AXex YXXng :d(啲)歌又幾好聽wor(喎)哈哈,我即刻搵番d(啲)原版來聽,多謝你地(哋)
YeXkei TXXi:成件事好陳瀅