13句對白照被踩　碧咸現身首映

前球星碧咸（David Beckham）再度挑戰大銀幕，雖然於《神劍亞瑟王》（King Arthur：Legend of the Sword）中飾演Blackleg首領一角僅得13句對白，但網民一樣唔受落，預告曝光後即惹來劣評，被狠踩演技差到嘔：「我真係唔好彩睇到啲咁差嘅演技。」又話：「我係套戲度唯一發現嘅係碧咸完全唔識做戲，而呢樣嘢我認為我一早就知。」直指碧咸好趕客，令人唔想買飛入場。

面對一片噓聲，見慣大場面嘅碧咸昨日仍笑晒出席《神》在倫敦舉行的首映禮，以一身Sharp醒西裝Look亮相，仲帶埋大仔布魯克林（Brooklyn）為自己撐場。碧咸一見到男主角Charlie Hunnam即上前相擁打招呼，Charlie同導演佳烈治（Guy Ritchie）於紅地氈合照時仲搞笑扮「HeHe」，兩個含情脈脈咁款拖住手。佳烈治的老婆Jacqui Ainsley亦穿上碧咸老婆Victoria品牌設計嘅粉紅色低胸連身裙，露出半球仲大露背，打扮性感。不過要數全場最博莫過於名模Poppy Delevingne穿上心口開窿嘅藍色超高衩長裙，搞到行步路都要勁小心，用手掩實高衩位以免走光。此外，佳烈治囝囝洛高（Rocco）亦有同女友Kim Turnbull拍拖到場。