名人：何倍倩學泰拳嚇怕老公

恒生新抱何倍倩今晚出席中環的活動時，對於同場首度來港的時尚Icon Iris Apfel亦在場，何倍倩表示未有機會跟她傾偈，她說：「冇呀，不過之前拍咗條短片問佢問題，我問咗條幾得意嘅問題，我問佢每日花幾多時間去襯衫，佢答話自己好隨心，無話要幾耐時間，所以我覺得原來佢係天賦，無話要花好耐時間去裝扮。（咁你平日要花幾多時間先出到門口？）都唔係話好耐，反而最花時間朝頭早做十至十五分鐘運動，做劇烈嗰隻，或者跳鄭多燕，因為朝早起身，好易口腫面腫，做完運動差好遠。」她說因為要做運動，故早上要花一個小時才能夠出門，她說近日更愛上打泰拳，作為自衛，如此打得，問到老公會否怕了她？她笑說：「其實打拳係需要一個拍檔，可能愈打愈大力，都想叫埋老公，所以佢都會驚咗我。」