【係愛呀】Miley從良新歌冧爆向里安示愛

大師兄終於返嚟！24歲美國女歌手Miley Cyrus本身係迪士尼出身嘅甜姐兒，2013年與澳洲型男里安漢斯禾夫（Liam Hemsworth）分手後性情大變，吸毒賣肉變「不文小天后」，幾乎好少見到佢身上有塊布遮好三點，不過佢去年與里安復合就火速轉型「從良」，近日更自復合後首推新歌《Malibu》，MV造型回歸純情，佢更於歌詞中向里安示愛，又搵埋男方為新歌封面操刀，放閃無極限！

Miley新歌MV日前曝光，兩年來首推新歌獲大批粉絲撐場，不過佢唔再賣肉Sell不文，反而係於草地與沙灘等地，著白衫放狗及拎汽球周圍跑，行清新又Sweet嘅路線，佢更於歌詞中講明係男方拯救佢嘅人生，冇諗過現時可以變成咁，感覺似「夢想成真」，加上於MV中戴埋二人的訂婚戒上陣，簡直Warm到世界盡頭！此外，Miley於MV中其實都有著比堅尼，不過就完全Sell健康性感，勁有活力，與2013年的《Wrecking Ball》全裸MV簡直係勁大對比！至於里安亦有於社交網轉發女友的MV撐場！