Ella自爆坐月沖凍水涼　網民鬧：瘋女人

台灣女團S.H.E成員陳嘉樺（Ella）上個月生咗囝囝「勁寶」，正式升呢做人母，你以為一向大癲大肺嘅Ella會收心養性，變咗一位正常媽咪？咁你就錯啦！之前好姊妹任家萱（Selina）出活動時就大爆Ella坐月時做埋啲「荒唐事」，不過Selina就唔肯透露詳情話要留番畀Ella自己講。Ella終於就係Facebook公開講究竟做咗啲乜嘢，就係坐月時因為怕熱，所以就偷偷沖凍水涼，仲要唔止一次，據中醫學說，產婦分娩後會有毛孔擴張嘅現象，沖凍水涼會好易「風邪」入體，加上產後身體虛弱，就算普通感冒都可大可小，唔少網民睇到都忍唔住留言鬧Ella係「瘋女人」同埋「最荒唐的女子」。

除咗爆自己荒唐事之外，Ella仲趁住母親節深情剖白多謝媽咪咁多年嚟嘅照顧，Ella話媽咪由細到大都好緊張佢，不過依家做埋人母，老公一直都好照顧佢，所以好想同媽咪講一句：「放心啦，我很好！」