摸演員陽具感尷尬　黃秋生大讚對手專業

由兩大影帝黃秋生及林家棟與女星衛詩雅合作、邱禮濤執導的英皇電影《失眠》快將上映，該片不乏虐殺、輪姦和虐打等重口味戲份，當中更有一幕由秋生動刀幫人「去勢」的戲份，大膽程度令戲迷擔心相關情節要於上映前被刪剪。然而片方今日公布被刪減片段主要有三處，包括「劏子孫根」、「割喉」、「生食人體殘肢」，三處合共刪去幾秒，故基本上不會影響劇情。導演邱禮濤對此笑言要劏雞還神，更笑指電檢處好仁慈：「其實拍攝嗰陣都有問自己，點解今次要去得咁盡？因為最終通過唔到，拍嚟都冇用。但估唔到今次電檢比我想像中輕手咗好多，真係好仁慈！」導演邱禮濤又言若日後戲迷要睇無刪剪版本，就要到外國影展觀賞：「受電檢條例所限，要喺香港再公開放映好困難，即使第日出碟都唔得！如果觀眾想係大銀幕睇嘅話，恐怕要去歐美、日本啲影展先有機會。不過好彩，依家放映嘅版本都只係少咗三個close-up，加埋都係唔見咗幾秒鐘，對觀眾嚟講損失唔算多！」

而秋生揚言《失眠》是其最後的恐怖血腥作品：「呢類型嘅電影，我唔敢講我唔拍；但呢類型嘅角色呢，我就一定唔再做㗎喇。」他更透露拍攝替船木一輝「去勢」戲份時感到尷尬：「呢場戲真係去得好盡『去勢』喇，劏落去嗰下梗係道具（指陽具）啦，但劏之前我要拎住抽真嘢左度右度，又要唸對白…佢尷尬時，我仲尷尬，最終大家都好快完成拍攝。」秋生事後力讚對手船木一輝專業，又大讚特技化妝師黃國義：「今次係佢第一次參與電影製作，做得好快，好準確，仿真度又好高。我拎住嗰抽道具（指假陽具），仲不停滴緊血水，直頭好似真嘅一樣！」秋生又提到衛詩雅於片中有一幕吃自己手臂的戲份，他指該幕的「血肉」是由叉燒及士多啤梨汁做成。秋生笑說：「真係幾好味㗎，拍完之後成班工作人員分咗嚟食，『仲有最後一啖，邊個要』咁樣㗎！」