正呀喂！甄子丹落實拍《葉問4》

影星甄子丹與太太汪詩詩一同出席活動，談到資深藝人于素秋逝世，子丹說：「我都有留意，好惋惜，佢係我哋前輩，我好細個時已經睇晒佢嘅戲，但就冇見過佢。（你媽咪學詠春識唔識佢？）咁我就唔知。（最欣賞佢邊套？）最欣賞佢同曹達華套《如來神掌》。（佢係咪你偶像？）係呀，我細個都成日扮曹達華，不過我太太就唔識佢。（咁你學功夫係咪因為佢？）唔係，我嗰陣仲細個都未學功夫。」子丹又透露已落實接拍《葉問4》，預計明年三月會開拍，屆時待導演葉偉信準備好劇本後，便會一起討論，但自己就不會做動作導演，會交由袁和平擔任。

此外，提到早前詩詩帶囡囡欣賞韓國男團BTS的騷？詩詩說：「依家小朋友好流行，佢哋好鍾意聽佢歌同跳舞，咁子丹唔使拍戲咪叫佢陪佢哋去睇。（個女有表演欲畀佢入行？）依家未諗住，等佢成熟啲先，佢唔知入行好辛苦，佢係有天分，不過唔知佢得唔得，佢好享受上台表演，當係嗜好，朋友生日搵佢唱歌。（個仔鍾意打功夫？）佢未定，好多嘢都有興趣，家姐做乜佢做乜，佢好鍾意煮嘢食，屋企多個廚師唔介意。」日前母親節子丹在社交網站上載與媽媽的合照，他表示媽媽在波士頓，沒有一起慶祝，但每年都會越洋送花表心意。