【真識食】Taylor傳撻著李安新星Joe Alwyn

27歲美國人氣天后Taylor Swift出名為「集郵女王」，出道多年換畫幾乎與出碟次數一樣多，仲勁識食食盡各界人氣型男，當中歌壇有John Mayer與Harry Styles，DJ界有Calvin Harris，影壇就有積佳蘭賀（Jake Gyllenhaal）與湯赫度斯頓（Tom Hiddleston），就算最後情花唔結果，個前度名單都「見得吓人」，唔拍得都睇得吓！

而Taylor自去年9月與湯赫度斯頓結束三個月貨仔戀情後一直「潛水」，鮮見出席公開活動，不過近日終於「上水」，更被爆秘撻早前處女拍戲就擔正李安執導作《比利．林恩的中場戰事》（Billy Lynn's Long Halftime Walk）的26歲英國小鮮肉Joe Alwyn，又將個靚仔新兵收為己用！

英國傳媒爆出二人鑑於Taylor與湯拍拖高調而變短命情，決心低調行事，Taylor近月為見身處英國與父母同住的Joe，更戴假髮變裝去當地探愛郎，有指Taylor另於倫敦北部租屋，二人一心認真發展地下情！此外，據悉《比利．林恩的中場戰事》去年11上映時，Taylor曾被拍到與好友及媽媽現身荷里活試映活動，未知係咪當時睇戲即睇中新仔！

雖然《比利．林恩的中場戰事》去年上映票房未如理想，不過Joe處女拍戲的表現大獲好評，火速戲接戲，下月初有第二部電影作品《謎情日記》（The Sense of an Ending）上映，之後又於奧斯卡影后愛瑪史東（Emma Stone）合作拍《The Favourite》演情侶，上位指日可待！至於鮮見曝光的Taylor前日亦自「潛水」4個月後，被拍到於媽媽家門外。