杜大偉頂替曾守明工作：開心延續佢角色

無綫藝人杜大偉（David）有份投資的火煱店今日開張，邀請圈中不少好友出席，他一早到場招呼賓客，近期他在電視劇《心理追兇》中飾狂迷、演得入型入格，一致獲好評，被問到行街時有否因變態角色太神似而被當街鬧？David說：「冇喎，反而啲人好同情我，而唔係驚咗我，因為我係戲中被王君馨殺死。其實拍之前都參考咗啲真實案例，亦有同監製同王君馨商量可唔可以去得盡啲，唔係點到即止嗰啲，仲驚去得太盡會太血腥。」

至於王君馨即將結婚，是否已準備賀禮？David說：「佢返嚟請佢食餐好嘅，佢知我做食肆，《心》結局時有叫大家嚟邊食飯邊追劇。」另David又謂剛於橫店趕拍《天命》回港，本來可小休，但一返嚟就知道曾守明離世，公司致電叫他去接替曾守明在《大帥哥》的角色，David說：「本身我有兩套劇要拍，但好想接呢個角色，因我與守明哥都好有淵源，結果第二朝就聽到劇組話可以放人，好開心我可以延續佢嘅角色，守明兄之前拍咗兩場戲亦唔會刪，同時有個原本搵佢做嘅婚禮司儀同籌劃工作，亦都有人叫我代佢做，我同守明兄私下好熟，識咗十幾年，佢人緣又好，能夠幫手完成佢未完成嘅工作，我都有啲安慰。」