10年前劇集翡翠台首播　陳錦鴻返TVB宣傳

無綫本月29日將於黃金檔推出10年前拍攝的劇集《蘭花刼》，安排台前幕後包括主角田蕊妮、陳錦鴻、陳自瑤及姚瑩瑩等今午出席宣傳活動，場面熱鬧。一班演員被安排拍照，用作10年前後對比，獲證分別不大兼凍齡，惟大部分演員對劇情印象模糊，阿田更搞笑指會追看望勾起記憶！

唔會提前要求解約

已簽約別家電視台、合約至明年2月才屆滿的陳錦鴻，孖住田蕊妮受訪，坦言接獲高層曾勵珍電話，得悉要推出《蘭》劇時，起初愕然：「以為冇得出街嘅（指《蘭》劇），作為演員梗係想多啲人睇到自己嘅作品啦！（網民話你終於有劇出，想返無綫拍劇？）咁要有人搵先得，但都想嘅，演員好被動嘛，依家我呢個年紀，可以演成熟少少角色。（簽咗第二間，浪費好多時間？）演員嘅工作包括等待，有錢收嘅，所以唔可以咁講。（今次幫無綫要通知公司？）又唔使，長時間嘅工作先要講，我係可以亮相其他電視台嘅。（擔心約滿失業？趁機提前終止合約？）擔心（失業）㗎，但我有始有終，唔會提出要求嘅。」