藝人唐詩詠及洪永城日前宣布分手，隨即傳聞滿天飛，前晚詩詠聲淚俱下澄清冇新歡，亦不是貪錢之人，其後蔡思貝及馬國明被牽涉入這段戀情當中，今日詩詠到尖沙咀出席新車發布會活動，再次成為焦點，詩詠身穿粉桃紅色Tube Dress騷香肩，在台上努力擠出笑容，但眼腫腫蓋不住憔悴神色，她在台上講車經，表示自己喜歡較安全的車：「要硬淨保護到我，之前畀人撞到對方架車凹晒，我架車就冇事。」她又食住劇集《不懂撒嬌的女人》熱潮，用台妹嗲功叫司儀陳智燊買車給她，以普通話高呼：「好棒棒呀！」剛分手的她仍有心情搞笑，表現專業。

詩詠接受訪問時開腔為近日的傳聞作出回應，神情明顯比之前鎮定及冷靜，期間亦有笑容，問到心情如何，她說：「OK呀！（個樣好累咁喎！）唔係呀！呢幾日都要開劇，好多謝好多朋友畀鼓勵訊息畀我，感受到溫暖。（你眼好腫喎，有喊？）水腫呀！我已經好努力跑步，會再跑。（洪永城話心痛你？）有睇到，呢幾日都feel到好多溫暖，在心中。（心情未平復？）都平復咗喇！恢復咗。（佢咁支持你，有機會再坐低傾吓？）暫時唔講呢樣，我好多謝佢，知道佢都承受咗好多壓力，互相支持大家，在心中。」

問到有指洪永城跟蔡思貝有親密關係才導致分手？她說：「我都知道會有唔同報道出現，我哋分別已經喺網上講咗要講嘅嘢，我唔會再講。（頭先你話買車要有安全感，因為之前男友冇？）我梗係唔答你呢條問題啦！（安全感對你好重要？）對每個女人都重要啦！但希望大家唔好代入呢件事度，我哋想保留私隱，唔再交代，希望可以向新目標出發。（之前有人話你聽到蔡思貝你就調頭走？）當日落雨呀！（見到佢都冇嘢？）係啦！」

問周焯華手下盧啟邦是否追她？她說：「呢個唔講喇！要講都講晒。（今次分手牽涉好多人？又蔡思貝又馬國明！）係呀！所以都唔好意思，牽涉咁多人，希望告一段落，每個人都有新開始。（盧先生有冇再搵你？）唔講其他人喇！（公司有冇搵你再了解？）公司同事有留鼓勵說話，好多人都有，多謝監製，就算合作過一、兩次嘅人都有，好多謝！」

眼淺的詩詠受訪期間兩度眼濕濕，首先是表示Feel到很多溫暖在心中時，到最後講到得到很多公司同事支持，她再度感動到眼濕濕。