收入不穩勁徬徨！譚永浩窮到冇錢返屋企

藝人譚永浩（Jarryd）近年除了擔任無綫節目《安樂蝸》的主持而成功入屋外，更與同為藝人的盧峻峯、董敬文成立專頁《喂霞姨》，在其社交網站上載搞笑及唱歌短片成為網絡紅人，引起網民關注。現時Jarryd的事業逐漸起步，工作機會接踵而來，不過他坦言經歷過拮据的生活，不但沒有能力給家用，就連生活亦成問題：「當時收入唔穩定，試過月尾嘅時候銀行戶口剩番一百蚊，所以當時我好徬徨，要計住每日只係可以用幾多錢，而最後連增值八達通嘅錢都冇，要搵朋友借錢畀我，先返到屋企。」

入行多年的他，為人熟悉的除了拍片和主持的工作外，其實他更在2010年英皇新秀歌唱大賽曾奪得「金咪大獎」，絕對是一位唱得之人！他憶述：「由細到大都好鍾意唱歌，大個就諗住試吓參加新秀，點知拎到獎，真係冇諗過。」但同樣因為背負獎項的壓力下，令他逐漸對唱歌產生抗拒，更形成不少的壓力：「嗰時好驚自己唱得唔好，變得好緊張，不過好彩後來得到一位朋友嘅開解，令我改變想法，重拾當初對唱歌嘅熱情。」

由歌手轉為演員，全因他希望能夠成為一位全方位的藝人，但亦因一次電影的casting失敗後，使他下定決心要學做戲，繼而參加無綫的藝訓班，問到期間最大的得着？他直言感激導師鄭丹瑞（旦哥）的教導，除了令他了解演戲的理論知識外，更重要的是學習做人的態度，增益不淺：「旦哥經常同我哋講，做新人最緊要唔好怕蝕底，一開頭出嚟一定係企喺後面，做唔起眼嘅角色，但點都要笑面迎人。」全因旦哥的一席話，在他的心底打下一支強心針，令他更明白要做好自己，認真對待每一個崗位。

髮型:Ray Hui@next salon

服裝:Workware Heritage Clothing Co.

場地:image kitchen

鳴謝:Barry@J&B Ent