田蕊妮黑獄捱打:後生頂得住!

20170526
東網電視
更多新聞短片
《蘭花刼》將於29日起晚上九時三十分在翡翠台首播。
【特約報道】無綫劇集《蘭花刼》將於29日起晚上九時三十分在翡翠台首播,劇情講述蘇玉華、田蕊妮及唐寧是失散多年的三姊妹,因蘇玉華被指殺養母面臨入獄,田蕊妮為救她而頂罪入獄,卻發現一切原來是蘇玉華的預謀,而胡定欣當年仍做女配角的角色,飾演一位懷孕的女囚犯,要在獄中產子。
胡定欣演孕媽媽
田蕊妮指《蘭》是她當年加入TVB首部拍攝的劇集,她笑言當年常在電影城蕩失路:「連化妝間、民初街喺邊都唔知,最記得呢部劇喺中環歷史建築域多利監獄取景,拍嗰陣真係覺得似坐緊監!」又指劇中有不少被打、情緒崩潰的戲份,因此拍每一場都十分費勁,她笑說:「好彩嗰陣廿幾歲,身體頂得順,依家就未必得!」
胡定欣則飾演懷孕女囚犯,當年已做「媽媽」的她對拍攝現場最為深刻,她透露難得入域多利監獄拍攝,令她大開眼界,廠景亦做得相當有真實感,問到與田蕊妮當年可有對手戲?她說:「我同佢應該有對手戲,可能係我哋第一次合作,唔記得細節喇,但當年我已經做媽媽,仲記得個BB得十日大,抱佢時都有啲驚!」
黃智賢同蘇玉華溫馨出浴
近年經常飾演丈夫角色的黃智賢於此劇亦飾演蘇玉華老公,他笑指在劇中當對方是女神,問到對蘇玉華飾演反派感覺如何?他說:「佢對住我好溫柔、好斯文,甚至到最後我為佢犧牲好多嘢,一直覺得佢係無辜,最後知道真相就好震驚!」他亦爆料指與蘇玉華有不少溫馨場口,當中最吸睛的是二人的出浴戲。
唐寧則飾演田蕊妮及蘇玉華的細妹,她大談對拍攝時最深刻的印象:「最記得喺域多利監獄拍,嗰度係古蹟,唔係人人入得去,有種感覺似回到過去咁!」她又指劇情雖然較沉重,但當時每位演員都拍得很投入,又玩得開心!
胡諾言讚個個凍齡
胡諾言飾演癡情醫生,一直追求唐寧,又指劇種包含女子監獄是罕有題材,對於十年後劇中各演員外貌沒甚轉變,他笑說:「連珍姐(無綫高層曾勵珍)都話我哋個個凍齡無變過, 我仲覺得年輕咗添!」
陳錦鴻則在劇中與田蕊妮一對,被問當年的阿田演技是否幼嫩?他否認說:「其實我睇過佢以前嘅劇,都唔錯!」他又表示期待劇集播出,希望劇集播出後反應好就有機會再拍劇: 「唔係戲癮起,係我需要工作,依家囝囝都大個,係時候放多啲時間喺工作!」