黃翊爆暖心仔仔色士風吹自己舊歌

歌手黃翊現身電台訪問，他笑指自己是歷史人物，這天分享以前加入和離開樂壇的歷史。說到正在錄製新歌並準備出碟，他表示新歌關於20年來的經歷：「冇入錄音室好耐，不過冇乜分別，好自在。依家傾緊公司發行，要自己做，好彩有朋友係呢方面能手。」由於大排檔生意已經上軌道，他認為現在是個好時機。

暖心仔仔色士風吹自己舊歌

提及12歲的兒子，黃翊笑言對方對自己上電視沒大反應：「佢好cool，望一望話『睇到啦，你吖嘛』。」他指兒子以前不相信自己是歌手，現在對自己認識多了，有時更會用色士風吹奏自己的歌：「以前我同佢都冇聽自己啲歌，唱k如果朋友話搵我啲歌，我會走，我唔懷念同留戀以前。」他笑說兒子仍然當他是任勞任怨的工人，但有次開車時被鄰車的人認出，並跟他打招呼：「阿仔問我開唔開心，我問番佢，佢話開心，咁我都開心，可能我唱歌感染到人。」

狂讚仔仔搶風頭

黃翊指兒子學吹色士風近半年，不算經常練習，但音準和拍子很好：「有次帶佢睇我綵排，佢發現我有少少走音，我話『你有料到喎』。」黃翊坦言想父子同台演出，早前薛家燕生日，他叫兒子吹奏生日歌，但對方不肯：「第日佢想買隻game，我話冇錢，叫佢用表演嚟交換，佢即刻話好。」他透露兒子本來因人多而緊張得心狂跳及腳震，沒料到一拿起色士風就表現得好好：「好出奇，原來佢有壓力就爆發小宇宙，搶晒老竇風頭！」