愛孖袁詠儀掃街　張智霖至愛咖哩魷魚

男星張智霖現身護膚品牌活動，他表示已為該品牌擔任了四年代言人，早前為拍品牌宣傳片而返無綫，他說：「好耐冇返去電視城，都係幾好嘅體驗。（有冇興趣返無綫拍劇？）有，睇時間同劇本最重要，我都想提供多啲服務同娛樂畀香港巿民。嚟緊我喺添馬艦同黎明、陳小春做騷，三個人會有好多互動。（會唔會一齊跳舞？）有好多唔同嘢會發生，同埋會有好多香港情懷。」

自爆愛銅鑼灣掃街

他笑言提到香港情懷，他最愛就是香港的街頭小食，並自爆：「我經常都會喺銅鑼灣掃街，啲人見到我都好友善，唔會阻住我掃街。（店主係咪會送多粒魚蛋畀你？）都會。（有冇唔收你錢？）都試過唔收，但我就數還數，我都會盡量畀番錢，但有時盛情難卻。我最鍾意食咖哩魷魚。（會唔會一家人一齊掃？）我一個人掃就快啲，老婆（袁詠儀）都會掃，佢鍾意食燒賣，囝囝就食雪糕，有啲雪糕夾餅好好味。」

添馬艦表演撞正媽咪生日

他表示在添馬艦表演當日，太太袁詠儀及兒子也會來捧場，而當天正是張智霖媽咪的生日，他也希望母親到場欣賞，他又指今年比較多為演唱會擔任嘉賓，之前才做完周柏豪演唱會嘉賓，又指朋友叫到，必定撐場。