父女世紀同台！秋官慚愧幫唔到欣宜

入行50年的藝人鄭少秋（秋官）一連兩場假紅館舉行的《鄭少秋半世紀．大時代》世界巡迴演唱會正式開鑼，唱到《誓不低頭》中段，其愛女鄭欣宜突然在台中出場，兩人拖手合唱，又互相錫對方面珠及攬攬，秋官說：「我嘅乖女，女神！」欣宜說：「Daddy恭喜你入行半世紀。」兩人擊掌後，欣宜續說：「多謝你邀請我嚟分享你咁開心嘅日子！好多人問我點解成日叫人『不要低頭』（《女神》歌詞），哈哈，因為我流住《誓不低頭》嘅血！」

秋官就表示多謝欣宜來：「知你推咗好多工作嚟，乖女！我好慚愧咁多年喺娛樂圈都幫唔到你，你今日嘅成績係靠你自己嘅奮鬥，I proud of you，引以為傲！希望支持我嘅朋友，都支持我個女。」又乘機幫欣宜宣傳電影《29+1》：「大家識做啦！」之後他就指要落台抖抖，叫欣宜幫他撐住，欣宜就獨唱出《女神》。